Gjykata Themelore në Prishtinë ka vendosur të vazhdojë masën e paraburgimit për dy muaj edhe ndaj të dyshuarit I.P., i cili akuzohet për grisjen e librit të shenjtë të fesë islame – Kuranit, më 3 mars 2025 në Prizren.

Kjo është bërë e ditur përmes një përgjigjeje të udhëheqëses së Zyrës për Informim dhe Komunikim me Media të Gjykatës Themelore në Prishtinë, Mirlinda Gashi, dërguar për Arbresh.info.

Sipas Gashit, vendimi për vazhdimin e masës së paraburgimit është marrë më 3 prill 2025.

“Referuar kërkesës tuaj për informata, ju njoftojmë se pas kërkesës së Prokurorisë Speciale të Republikës së Kosovës për vazhdimin e masës së paraburgimit në çështjen penale kundër të pandehurit I.P., Gjykata Themelore në Prishtinë – Departamenti Special me datë 03.04.2025 ka marr Aktvendim dhe ka aprovuar kërkesën e PSRK-së, ashtu që masa e paraburgimit të pandehurit I.P., i është vazhduar në kohëzgjatje prej 2 (dy) muaj”, thuhet në përgjigje.