Andin Hoti, i biri i veprimtarit të zhdukur Ukshin Hoti, ka thënë se në këtë 20-vjetor të kujtimit të babait të tij, nuk i takon të flasë gjatë rreth këtij rasti. Por ai ka deklaruar se të pagjeturit në Kosovë, kanë vetëm një adresë e ajo është Serbia.

Ai ka ftuar institucionet e vendit që të kushtëzojnë dialogun me Serbinë, që pa u zbardhur fati i të pagjeturve të mos ketë marrëveshje përfundimtare shkruan Ekonomia Online.

“Kosova përveç që u bë shtet ka formuar edhe ushtrinë, platformë që ka pasur edhe babai im. Në 20 vjetorin e zhdukjes së babait tim, fati i babait dhe i të pagjeturve është dështimi i organizatave të njeriut dhe institucioneve kosovare dhe faktorit ndërkombëtar. Të pagjeturit kanë vetëm një adresë, është drejtësia, ndërsa Serbia ka filluar edhe t’i mohojë krimet e njohura botërisht. Ftoj institucionet që të kushtëzojnë marrëveshjen se pa u ditur fati i tyre të mos ketë dialog dhe faktori ndërkombëtar të shtoj presionin ndaj Serbisë”, tha Hoti.