Gjuajtje me armë zjarri në Shtime, arrestohet një 20 vjeçar

20:41 | 11 Gusht 2025
E.G

Një 20 vjeçar është arrestuar pas gjuajtjes me armë zjarri në rrugën “Ymer Prizreni” në Shtime, gjatë një ahengu familjar të mbajtur dje.

Sipas njoftimit, arma e përdorur, një pistoletë është konfiskuar nga policia, shkruan Arbresh.info..

I dyshuari është shoqëruar në stacionin policor në Shtime, është intervistuar nga hetuesit dhe me vendim të prokurorit të shtetit, është liruar në procedurë të rregullt.

“Policia Rajonale e Ferizajt bën apel tek qytetarët që të shmangin përdorimin e armëve në festa, pasi ato rrezikojnë jetën dhe sigurinë e të gjithë pjesëmarrësve. Gëzimet le të festohen me zemër, jo me armë ! Çdo e shtënë me armë zjarri mund të sjellë pasoja të rënda dhe të pakthyeshme.”, thuhet në njoftimin e policisë./Arbresh.info/