Kryetari i Këshillit Parlamentar për Kosovën të Kuvendit të Serbisë, Millovan Drecun, ka thënë se është e domosdoshme që populli serb në Kosovë të ketë një perspektivë të qëndrueshme dhe ardhmëri të sigurt.

Drecun u tha gazetarëve në Kuvendin e Serbisë se për këtë qëllim ka rëndësi normalizimi i marrëdhënieve me shqiptarët që jetojnë në Kosovë, transmeton Koha.net raportimet e medieve serbe.

Kur u pyet për vazhdimin e rrugës evropiane të Serbisë, në kontekstin e hapjes së Kapitullit 35, Drecun u përgjigj se “nuk mund të flitet për atë sa kushton beteja për Kosovën e Metohinë, por sa do të na kushtonte nëse heqim dorë nga Kosova e Metohia, dhe kjo është e pallogaritshme”.

Sipas fjalëve të tij është e domosdoshme që në dialogun me shqiptarët të arrihen marrëveshje afatgjata të qëndrueshme për krijimin e kushteve që populli serb në Kosovë të ketë një perspektivë të qëndrueshme dhe ardhmëri të sigurt.