Ka dështuar të mbahet seanca e shqyrtimit fillestar në Gjykatën Themelore në Pejë, ndaj të akuzuarit për krime lufte, Milorad Zajic. Arsyeja për mos mbajtjen e seancës ishte mos pajisja e të pandehurit me shkresat e lëndës.
Mbrojtësi i të akuzuarit, avokati Milos Dileviq, deklaroi se nuk i posedonte të gjitha shkresat e lëndës, përveç aktakuzës, duke propozuar gjykatës që seanca e sotme të shtyhet.

“Nuk i kemi pranuar shkresat e lëndës nga prokuroria, përveç aktakuzës që i pandehuri e ka pranuar së bashku me ftesën për seancë”, ka thënë ai.

Prokurorja e rastit, Fikrije Fejzullahu deklaroi se kishte bërë përpjekje që mbrojtjes së të pandehurit t’ia sigurojë shkresat e lëndës, por kjo nuk kishte mundur të bëhej.

Kurse, sa i përket propozimit të PSRK-së për caktimin e masës së paraburgimit, mbrojtësi i të pandehurit deklaroi se masa e arrestit shtëpiak, ka dhënë efekt të plotë dhe si rrjedhojë sipas tij, gjykata është e obliguar të mos aplikojë masa me të rënda nëse masa më e lehtë do të ketë efektin e njëjtë.

Kurse, i pandehuri Zajic lidhur me këtë propozim deklaroi se nuk do të lëvizë nga shtëpia e tij, në të cilën është nën masën e arrestit shtëpiak.

“Unë nuk do të lëvizi nga shtëpia, por të vetmin problem të cilin e kam është se kam nevojë për trajtim mjekësor, e që do të bëjë nën mbikëqyrjen e policisë”, ka thënë ai.

Kryetari i trupit gjykues, Kreshnik Radoniqi mori vendim që seanca fillestare të mbahet më 22 gusht 2018, prej orës 10:00.

Ndërsa, lidhur me kërkesën e prokurorisë për caktimin e masës së paraburgimit, do të merret vendim pas seancës.

Ndryshe, sipas aktakuzës së ngritur nga Prokuroria Speciale e Republikës së Kosovës, Milorad Zajic, akuzohet për krime lufte, pasi pretendohet se gjatë periudhës kohore qershor-korrik të vitit 1998, në fshatin Dush të Komunës së Klinës, aktivisht kishte marrë pjesë si ushtar dhe paramilitar serb në ofensivat kundër popullatës shqiptare.

Në aktakuzë përshkruhet se i akuzuari Milorad, kishte përgatitur shtëpinë e tij që të shërbente si bazë e forcave serbe.

“Me datë 19 qershor 1998, rreth orës 12:00 në fshatin Dush, i pandehuri i veshur në pjesën e epërme me uniformë ushtarake dhe në pjesën e poshtme me pantollë civil, nga vetura e tij ‘Zastava’, ngjyrë e verdhë, shkarkoi tek shtëpia e tij në Dush, armë të kalibrit të ndryshëm”, thuhet në aktakuzë.

Sipas aktakuzës, i pandehuri më pas ka shtënë prej shtëpisë së tij, me automatik në drejtim të shtëpive të shqiptarëve.

Ndërsa, në pasditen e së njëjtës datë, siç thuhet në aktakuzë, filluan sulmet e serbëve në drejtim të fshatit Dush, dhe nga shtëpia e të pandehurit u dhanë urdhra për ofensivë.

Gjithmonë sipas aktakuzës, si pasojë e këtyre sulmeve, në tërësi u dogjën shtëpitë e shqiptarëve në fshatin Dush dhe u dogjën Zade, Osman dhe Haradin Marmullaku, i cili ishte i paralizuar.Sipas aktakuzës, pjesë e këtyre sulmeve ofensive ishte edhe vet i pandehuri Milorad Zajic. /betimiperdrejtesi

Lexo më shumë në: https://www.gazetaexpress.com/lajme/deshton-seanca-fillestare-e-gjyqit-per-krime-lufte-ne-kline-567725/?utm_source=referral&utm_medium=web&utm_campaign=copyright