Fushata ofenduese e kompanisë “Devolli”, ka vazhduar edhe me një billbord tjetër ku deputetja Margarita Kadriu është paraqitur si lopë
Billbordi, që është vendosur gjithashtu në qytetin e Pejës sikurse ai i Berat Buzhalës, mban mbishkrimin “M’GITA – Ushqim për kafshë”.Kadriu, e cila në zgjedhjet e fundit parlamentare garoi me listën e PDK-së me ç’rast edhe fitoi postin e deputetes, pak kohë pas formimit të koalicionit qeveritar LDK-PDK ishte tërhequr nga grupi parlamentar i kësaj partie duke u shpallur si kandidate e pavarur, më parë kishte qenë pronare e së përditshmes “Kosova Sot”.
Billbordi ofendues ndaj Kadriut është i dyti i ditës së sotme nga, siç shihet në billborde, korporata “Devolli”.

Ndërsa për këtë ka reaguar deputetja Kadriu, të cilin po ua sjellim më poshtë:

Qytetarë të nderuar,
Fjalimet e mia, si deputete e pavarur në Kuvendin e Kosovës, si dhe nisma ime për krijimin e Komisionit hetimor parlamentar për evazionin fiskal, kontrabandën, korrupsionin dhe krimin e organizuar I paskan shqetësuar jashtë mase kompanitë e lidhura me krimin e organizuar dhe politikanë të caktuar. Unë asnjë emër konkret nuk kam përmendur, sepse e kam ditë qartë se ata do të identifikohen vetë. Tani sapo mora informatën se njëra nga këto kompani , të lidhura me krimin dhe të “fortit” e këtij vendi paska shpërndarë billborde me shkurtesat e emrit tim.
Burime të afërta me këto kompani më njoftuan që të kam kujdes ,sepse dicka serioze është duke u përgatitur. Si zë kritik në Kuvend po planifikojnë të më “heqin qafe”(dicka e ngjashme si në Shqipëri).
Nëse dikush e ka menduar se unë do të zmbrapsem, e kanë gabim! Unë në Kuvendin e Kosovës jam zë I qytetarëve të këtij vendi dhe asnjë kërcënim e ofendim nuk do të më ndal që të mbetem gjithmonë zë i fuqishëm I qytetarëve kosovarë.
Në një shtet me sistem të konsoliduar të drejtësisë, shkelësit e ligjit do të përgjigjeshin deri në pikën e fundit, por në një shtet si ky yni, mashtruesit, dallaveraxhinjtë, linçuesit publikë dhe mentorët e tellallët e tyre, ia dalin të fyejnë e të dalin pa u lagur.
Falë një drejtësie të kapur deri në fyt, të zbehtë e të pafuqishme, të inkriminuar e të korruptuar, shpërdoruesit e buxhetit, abuzuesit e pushtetit, rrënuesit e demokracisë, mbeten ende të paprekshëm. Ata po e mbajnë peng të ardhmen tonë të përbashkët, perspektivën e fëmijëve tanë, prandaj duhet ta luftojmë këtë të keqe të madhe që ka zënë rrënjë thellë, në çdo qelizë të Republikës sonë.
Me respekt,
Margarita Kadriu