Ambasadori rus në Serbi, Alexander Chepurin, ka thënë se sa i përket anëtarësimit të Kosovës në UNESCO, Rusia beson se një veprim i tillë shkel rezolutën 1244 të OKB-së për Kosovën.

“Rusia beson se qëndrimi i Serbisë është i drejt dhe legjitim dhe kjo çështje është e një rëndësie të madhe. Rusia do të mbështesë Serbinë në atë që Beogradi e konsideron të nevojshme për mbrojtjen e nevojave të saj kombëtare”, ka thënë Chepurin për “Tanjug”-in serb, transmeton KosovaPress.

Ai ka thënë se Rusia nuk pajtohet me strategjitë që ushtrojnë presion ndaj Serbisë në lidhje me UNESO-n përmes dialogut që zhvillohet në Bruksel mes Prishtinës dhe Beogradit.

Sipas tij, anëtarësimi i Kosovës në UNESCO është i kontestueshëm për shkak se drejtpërdrejt shkel Rezolutën 1244 të miratuar nga anëtaret e Këshillit të Sigurimit të OKB-së në vitin 1999.

“Kur flasim për anëtarësimin eventual të Kosovës në UNESCO, po flasim për politizimin e këtij institucioni ndërkombëtar. E mbështesim Serbinë në qëndrimin e saj, pasi në përputhje me Rezolutën 1 244 Kosova nuk është e pavarur”, ka thënë Chepurin.