Ambasadori i Bashkimit Evropian në Kosovë, Aivo Orav, ka deklaruar se ende nuk ka një përgjigje përfundimtare lidhur me masat ndëshkuese të BE-së ndaj Kosovës.

Ai theksoi se diskutimet për këtë çështje janë ende në zhvillim brenda Këshillit të BE-së.

Ai shtoi se vendimi përfundimtar për heqjen e masave i takon të 27 vendeve anëtare të BE-së, pasi kërkohet konsensus i plotë.

“Kam frikë se nuk mund t’i jap një përgjigje përfundimtare kësaj pyetjeje. Siç e dini, ish-Përfaqësuesi i Lartë i rekomandoi Këshillit në qershor 2024 heqjen e masave. Më pas, në dhjetor 2024, Këshilli në konkluzionet e tij për zgjerimin deklaroi se BE-ja gradualisht do t’i heqë masat paralelisht me hapat e mëtejshëm të Kosovës për të de-përshkallëzuar tensionet në veri. Diskutimet brenda Këshillit vazhdojnë dhe vendimi nëse masat do të hiqen përfundimisht i takon 27 vendeve anëtare të BE-së, pasi një vendim i tillë kërkon konsensus”, tha ai për Kosovo Online.

Ndërkohë, Orav tha se Përfaqësuesja e re e Lartë për Politikë të Jashtme dhe Siguri të BE-së, Kaja Kallas, ka shprehur përkushtimin që Kosova të ecë përpara në rrugën e saj drejt integrimit evropian.