Në tre vjetorin e vdekjes së aktivistit të Lëvizjes Vetëvendosje të Astrit Dehari,  kreu i komunës së Prishtinës, Shpend Ahmeti ka thwnw se ai ishte një njeri humanist dhe me zemër të mirë.

Ahmeti përmes një postimi në rrjetin social Facebook, ka thënë se Dehari shkonte në zyrën e tij, sa herë që takonte ndonjë qytetarë me halle nga gjendja e rëndë ekonomike, dhe kërkonte të gjendej ndonjë mënyrë që ta ndihmonin atë qytetarë.

“Astrit Dehari ishte aktivist politik, aktivist i LVV, student shembullor dhe për një kohë edhe punëtor shembullor në Komunën e Prishtinës. Përveç temave të drejtorisë së shëndetësisë, vinte te unë në zyre gjithmonë kur kishte takuar ndonjë qytetar në hall nga gjendja ekonomiko-sociale dhe mendonte se duhet ti ndihmojmë. E shihte si qëllim jetësor ndihmën për njerëzit në nevojë”, ka shkruar Ahmeti.

Ai, thotë se vdekja e Astritit në Qendrën e Paraburgimit në Prizren është barrë e pushtetit të atëhershëm, që mbajti padrejtësisht atë në burg.

“Vdekja e tij në burgun e Prizrenit ku ishte dërguar dhe mbajtur padrejtësisht mbetet e pasqaruar. Dhe kjo është barrë jo vetëm për pushtetin e atëhershëm politik e administrativ, por barrë për secilin qytetar të Republikës. Barra dhe përgjegjësia veçse do të shtohen deri të zbulohen krejt rrethanat dhe krejt përgjegjësit e asaj çfarë ka ndodhur”, thotë Ahmeti.

Në tre vjetorin e vdekjes së hershme të Astritit, Ahmeti e kujton Astritin  si një njeri , modest, punëtor, zë i butë për miqtë, e zë i fortë për drejtësi e barazi./arbresh.info

https://www.facebook.com/shpend.ahmeti/posts/10159047943177166