Ish-deputetja e Aleancës për Ardhmërinë e Kosovës, Donika Kadaj-Bujupi, që tani është pjesë e Lëvizjes Vetëvendosje, ka  akuzuar AAK-në për heshtjen ndaj audo-incizimeve të publikuar së fundmi në media.

Gjatë një konference për gazetarë, ajo ka deklaruar se AAK-ja ka një marrëveshje të fshehtë, por pa specifikuar se për çfarë bëhet fjalë.

I menjëhershëm ishte edhe reagimi i AAK-së. Zëdhënësi i kësaj partie, Muharrem Nitaj ka thënë për “Indeksonline” se partia e Hardinajt ka vite që ka folur për aferat konkrete, teksa të tjerë nuk e kanë pasur idenë rreth tyre.

“AAK ka vite që e ka ngritur alarmin për rrezikun nga kapja e shtetit. Bile kur AAK-ja ka folur për afera konkrete, tjerët nuk e kanë pasur idenë dhe kanë qenë në gjumë”, ka thënë Nitaj.

Sipas tij, përgjimet janë serioze dhe Aleanca thekson se duhet qëndrimin duhet ta japë Prokuroria e shtetit dhe organet e drejtësisë.

“Përgjimet që janë bërë janë bukur serioze dhe Aleanca thotë se qëndrimin duhet ta japë sa më parë Prokuroria e shtetit dhe organet e drejtësisë”, ka shtuar ai.

Ndërsa sa i perkat deklaratës së Donika Kadaj Bujupit se AAK  ka një marrëveshje të fshehtë Nitaj ka thënë se AAK asnjëherë nuk do të jetë e afërt me asnjë person i cili është i përfshirë në çfarëdo forme në veprimtari që sanksionohet me ligjet e Kosovës.

“AAK  asnjëherë në asnjë situatë nuk do të jetë e afërt me asnjë person i cili është i përfshirë në çfarëdo forme në veprimtari që sanksionohet me ligjet e Kosovës. Në momentin që konstatohet se këto përgjime mund të jenë bazë e mjaftueshme për ndjekje penale, është e domosdoshme që të fillojnë ndjekjet penale. Por pavarësisht një procesi të organeve të drejtësisë, tashmë AAK beson se ka hapësirë për një përgjegjësi politike të njerëzve, emrat e të cilëve janë lakuar në këto përgjime politike”, ka përfunduar Nitaj.