Në kuadër të përkujtimit të 28-vjetorit të Epopesë së Dukagjinit, një delegacion i Lëvizjes VETËVENDOSJE!, i udhëhequr nga kryetarja e Kuvendit, Albulena Haxhiu, së bashku me nënkryetarin e Kuvendit, Ardian Gola, deputetë dhe aktivistë, vizitoi kompleksin memorial “Dëshmorët e Kombit” në Gllogjan për të bërë homazhe te varrezat e dëshmorëve.

Në këtë ditë përkujtimore, Haxhiu theksoi rëndësinë e kujtesës historike dhe respektin për ata që dhanë jetën për lirinë e vendit.

“Para 28 viteve Gllogjani u rrethua me qëllimin që të shuhet një vatër e rezistencës sonë, por ndodhi pikërisht e kundërta. Familja Haradinaj së bashku me luftëtarët tjerë të lirisë, me kontributin e tyre e çanë rrethimin dhe dëshmuan se përpjekja për liri as nuk rrethohet, as nuk ndalet dhe as nuk thyhet. Sot nderojmë Gazmend Mehmetaj, Agron Mehmetaj dhe Himë Haradinaj. Kujtojmë dhimbjen e familjeve të tyre dhe popullit të Kosovës sikurse edhe lartësojmë veprën e tyre sublime”, tha kryetarja e Kuvendit, Albulena Haxhiu. /Arbresh.info