Një hotel në Tenerife të Ishujve Kanarie të Spanjës është bllokuar, pasi një mjek italian testoi pozitiv për koronavirus.

Qindra mysafirëve në hotelin H10 Costa Adeje Palace u ishte thënë fillimisht të qëndrojnë nëpër dhomat e tyre gjersa të kryhen testet mjekësore, raportojnë mediat spanjolle, transmeton portali arbresh.info.

Mjeku thuhet të jetë nga rajoni i Lombardisë, ku autoritetet italiane janë duke u përballur me shpërthimin e virusit.

Rastet globale të virusit kanë kaluar 80 mijëshin, shumica prej tyre në Kinë.

LEXO EDHE: Analizë: Sa jemi afër një pandemie?

Irani, një prej bendeve më të prekura jashtë Kinës, njoftoi se zëvendësministri i shëndetësisë, Iraj Harirchi, kishte rezultuar pozitiv për virusin.

Organizata Botërore e Shëndetit (OBSH) tha të hënën se bota duhet të bëjë më shumë për t’u përgatitur për një pandemi të mundshme – një situatë kur një sëmundje infektive përhapet lehtësisht midis njerëzve në shumë vende.

Përqindja e personave të infektuar që vdesin duket të jetë midis 1% dhe 2%, megjithëse OBSH paralajmëron se shkalla e saktë e vdekshmërisë nuk dihet ende./arbresh.info/