Përgjegjësit për manipulim të dijes në institucione të arsimit të lartë në Kosovë duhet të ndëshkohen. Kështu kanë kërkuar të shtunën anëtarë të Komisionit Parlamentar për Arsim.

Ata kanë thënë se përhapja e plagjiaturës te profesorët, si dhe studentët që u larguan nga lista e bursave të USAID-it, sinjalizon “bombën” që ka rënë në arsimin e lartë.

Ismail Kurteshi, anëtar i Komisionit Parlamentar për Arsim, ka thënë se për të luftuar plagjiaturën së pari duhet të funksionojë shteti ligjor, duhet të ekzistojë edhe institucioni i përgjegjësisë.

“Por, gjeneratat më të vjetra, profesorë e pushtetarë po e shkelin ligjin përherë dhe në çdo formë, në format më të vrazhda dhe nuk po përgjigjen edhe atëherë kur janë para organeve të drejtësisë, madje po tallen me to siç janë rastet e arrestimeve, spitaleve, daljeve, ikjeve, por dhe po mbeten pa dhënë kurrfarë përgjegjësie për ata që kanë shumë argumente që ose kanë falsifikuar diploma…, dhe askush nuk po merret me këto raste”.

Kurteshi thotë se plagjiaturë kanë bërë profesorët e që në fakt duhet të jenë shembull për studentët. /Zëri/