Organizatat e Dala nga Lufta e UÇK-së, kanë përsëritur qëndrimin e tyre ndaj Gjykatës Speciale, duke thënë se vazhdojnë të qëndrojnë në atë se Gjykata Speciale duhet të shfuqizohet, transmeton arbresh.info.

OVL e UÇK-së, ka lutur ambasadorët e KUINT-it, që të mos bëjnë presion mbi deputetët Kuvendit të Kosovës, pasi që sipas tyre ata janë sovrani i votës së popullit.

Ky është njoftimi i plotë i OVL-së së UÇK-së:

“Ne si OVL UÇK, ishim dje dhe jemi edhe sot për shfuqizimin e Gjykatës Speciale sepse konsiderojmë se kjo gjykatë është e njëanshme, prandaj përmes kësaj komunikate i bëjmë me dije opinionit publik se ne si veteranë të luftës së Ushtrisë Çlirimtare të Kosovës, nuk kemi qenë dhe as nuk jemi kundër drejtësisë dhe organeve të saj, por kemi qenë dhe jemi kundër padrejtësive që po na shkaktohen si popull viktimë e luftës së fundit në Kosovë, sepse siç e dini, ne kemi kërkuar dhe kërkojmë në vazhdimësi që të krijohet Gjykatë vendore, e cila do të merrej me gjykimin e të gjitha krimeve të shkaktuara gjatë luftës në Kosovë.

Sa i përket kësaj, i lusim Ambasadorët e shteteve mike të KUINT-it, që të mos bëjnë presion mbi deputetët e Kuvendit të Republikës së Kosovës, sepse ata janë sovrani i votës së popullit.

Kurse, kërkojmë nga Kryesia e Kuvendit dhe Kryetari i saj, që ta procedojnë iniciativën për shfuqizimin e gjykatës special, si obligim kushtetues që e kanë./arbresh.info/