Agron Selimaj deri dje ishte drejtor i Agjencisë Kosovare të Inteligjencës. Ai në këtë post u emërua me 2 shkurt të vitit 2015 nga Presidentja e atëhershme Atifete Jahjaga dhe Kryeministri Hashim Thaçi.

Detyra e tij kryesore ishte të mbledh, analizojë dhe shpërndajë inteligjencën tek institucionet kompetente.

Por duket se dështimi në kryerjen e kësaj detyre bëri që ai të japë dorëheqje nga ky post. Sipas burimeve të portalit arbresh.info ai nuk arriti që të informojë organet kompetente në lidhje me trenin e mbushur me ngjyrime provokuese që ishte nisur nga Beogradi për në Mitrovicën veriore.

Në letrën e tij të dorëheqjes është e paqartë se çfarë bëri që Selimaj të merrte një vendim të tillë, duke cituar arsyet familjare.

Misioni i AKI-së është identifikimi i kërcënimeve që rrezikojnë sigurinë e Kosovës. Një kërcënim i tillë ishte treni me mbishkrimet “Kosova është Serbi”, kërcënim ndaj integritetit territorial dhe integritetit të institucioneve të republikës, dhe atë ditë kreu i agjencisë kryesore të inteligjencës humbi kredibilitetin për të ofruar siguri ndaj qytetarit të Kosovës.

A është dorëheqja e kreut të inteligjencës një sinjal që ai do të hetohet nga organet kompetente për rrezikim të sigurisë së përgjithshme? Mbetet të shihet një gjë e tillë./Arbresh.info