Përhapet me të madhe sëmundja Gungore e Lëkurës së Gjedhit në Kosovë.

93 ferma tashmë janë të prekura nga ky virus. Derisa 20 kafshë kanë ngordhur nga ky virus.

Agjencia e Ushqimit dhe e Veterinarisë zgjidhjen e vetme e ka eliminimin e kafshëve të prekura nga ky virus, por problemi kryesor qëndron në faktin se fermerët nuk kompensohen për kafshët e asgjësuara, sepse nuk ka buxhet.

Janë 270 mijë krerë gjedhi në gjithë Kosovën, të cilët rrezikojnë të infektohen nga ky virus, derisa vaksina që i mbron gjedhet nga virusi mungon.

Vetëm 25 mijë kafshë u vaksinuan falë një donacioni të Komisionit Evropian. Agjencia e Veterinës ka kërkuar edhe 25 mijë vaksina të tilla.

Momentalisht, kjo sëmundje, e cila po klasifikohet si sëmundje socio-ekonomike, nuk është e rrezikshme për njerëzit.

Drejtori i Institutit të Shëndetit Publik, Naser Ramadani, i ka thënë Kohavisionit nëpërmjet telefonit se konsumimi i produkteve që vijnë nga gjedhet edhe nëse janë të infektuara, nuk paraqet asnjë problem për njerëzit.