Gabriel Jesus është shfaqur si një opsion i mundshëm për Milanin përpara merkatos së verës, me sulmuesin e Arsenalit që tashmë i është propozuar “Rossonerëve” pas një ndryshimi të fundit në menaxhimin e tij.

Sipas Alfredo Pedullà, braziliani ndërroi agjent në janar dhe tani është pjesë e të njëjtit grup menaxhimi si trajneri i Milanit, Massimiliano Allegri.

Kjo lidhje ka ndihmuar që emri i tij të futet në radarët e klubit, me kontaktet e para që datojnë prej disa muajsh.

“Nuk është surprizë që ai lidhet me Milanin,” shpjegoi Pedullà.

“E kemi përmendur që në janar ndryshimin e agjentit dhe faktin që ai iu bashkua grupit Branchini. Branchini është agjenti i Allegrit dhe Gabriel Jesus ishte ofruar tashmë te Milani”, tha ai.

Ai shtoi: “Kjo është një mundësi konkrete. Duhet ta përfshijmë Gabriel Jesus në listën e sulmuesve që mund të lidhen me Milanin”.

Roli i tij tek Arsenali është zvogëluar, sidomos pas ardhjes së Viktor Gyökeres, gjë që ka kufizuar minutat dhe ndikimin e tij në skuadër.

“Kontrata e tij nuk është shumë e gjatë, ai po luan më pak dhe klubi ka sjellë Gyökeres, kështu që situata ka ndryshuar,” shtoi Pedullà.

“Gjithçka do të varet nga vlerësimi i Arsenalit, por ai është një sulmues i fortë, gati për një eksperiencë të re”, u shpreh ai.

Sipas tij, një transferim i tillë mund të jetë një hap përpara për sulmin e Milanit.

“Mendoj se ai do t’i jepte më në fund Milanit atë hap cilësor që i mungon. Prej kohësh po kërkojnë një ‘numër 9’. Duhet ta ndiqni këtë situatë, sepse gjërat mund të zhvillohen në maj”, e mbylli ai.