Liga më e fortë në botë konsiderohet prej vitesh Premier League, por java e parë e ndeshjeve të 1/8 së finales në UEFA Champions League ka treguar një realitet krejt tjetër për klubet angleze. Pavarësisht se Anglia kishte gjashtë përfaqësues mes 16 skuadrave më të mira të Evropës, asnjë prej tyre nuk arriti të fitojë në ndeshjen e parë.

Në fazën e 1/8 së finales u kualifikuan Arsenal, Tottenham Hotspur, Liverpool, Chelsea dhe Manchester City, ndërsa Newcastle United iu bashkua këtij grupi pasi eliminoi Qarabağ FK në play-off me rezultat të përgjithshëm 9-3. Megjithatë, pas ndeshjeve të para të kësaj faze, bilanci i tyre është zhgënjyes: zero fitore në gjashtë ndeshje.

Edhe pse jo të gjitha skuadrat angleze hynin si favorite në përballjet e tyre, java e parë e eliminatoreve solli surpriza të mëdha dhe disa humbje të thella. Madje, katër nga gjashtë klubet angleze tani duhet të bëjnë përmbysje në ndeshjet e kthimit nëse duan të arrijnë në çerekfinale.

Një nga goditjet më të mëdha ishte humbja e Manchester City në Madrid. Skuadra e drejtuar nga Pep Guardiola u mposht 3-0 nga Real Madrid në stadiumin Santiago Bernabéu.

Heroi i mbrëmjes ishte Federico Valverde, i cili realizoi një hat-trick dhe i dha madrilenëve një epërsi të madhe para ndeshjes së kthimit. Media britanike ishte shumë kritike ndaj trajnerit spanjoll për zgjedhjet taktike dhe formacionin.

Sipas mediave në Angli, vendimet e Guardiolës – duke aktivizuar lojtarë si Khusanov dhe Savinho nga minuta e parë dhe duke eksperimentuar në mbrojtje – nuk funksionuan. Analizat theksojnë se as ndryshimet gjatë ndeshjes dhe as zëvendësimet nuk arritën ta shpëtonin skuadrën nga një humbje e rëndë.

Humbje të thella edhe për Tottenhamin dhe Chelsean

Problemet e klubeve angleze nuk ndalën vetëm te City. Tottenham Hotspur u mposht 5-2 nga Atlético Madrid, ndërsa Chelsea FC pësoi të njëjtin rezultat 5-2 në transfertë ndaj Paris Saint-Germain.

Në rastin e Chelseat, londinezët arritën të barazonin 2-2 në Parc des Princes, por në minutat e fundit pësuan tre gola dhe tani përballen me një mision shumë të vështirë për ndeshjen e kthimit.

Arsenal dhe Newcastle mbajnë shpresat gjallë

Dy skuadrat e vetme që arritën rezultate pozitive ishin Arsenal dhe Newcastle United, të cilat barazuan 1-1 në ndeshjet e tyre.

“Topçinjtë” barazuan ndaj Bayer 04 Leverkusen dhe do të kenë avantazhin e ndeshjes së kthimit në Emirates Stadium, ndërsa Newcastle mori një pikë ndaj FC Barcelona, por ndeshjen e kthimit do ta luajë në Camp Nou.

Premier League ende duhet ta dëshmojë dominimin

Ish-mbrojtësi anglez Jamie Carragher theksoi se Premier League ende duhet ta provojë dominimin e saj në Evropë.

Sipas tij, klubet angleze shpesh dominojnë në fazat e para të garës, por kanë vështirësi në momentet vendimtare të turneut. Ky argument i jep disi të drejtë edhe ish-presidentit të UEFA, Michel Platini, i cili vite më parë kishte deklaruar se klubet angleze janë “luanë në dimër dhe dele në verë”.

Ndeshjet e kthimit të 1/8 së finales pritet të tregojnë nëse skuadrat angleze do të arrijnë të përmbysin situatën apo nëse ky sezon do të shënojë një nga dështimet më të mëdha të tyre në Ligën e Kampionëve./Arbresh.info