Bayern Munich ka konfirmuar se ka hapur negociatat për një kontratë të re me kapitenin e Anglisë, Harry Kane.

Sulmuesi anglez ka shënuar 34 gola në 30 paraqitje për gjigantët e Bundesligës këtë sezon, duke nxitur spekulime se ai mund të rikthehej në Premier League.

Ai iu bashkua Bayernit nga Tottenham në gusht të vitit 2023 dhe në kontratën e tij ekziston një klauzolë lirimi prej 54 milionë paundësh, e vlefshme këtë muaj, ndërsa marrëveshja aktuale përfundon verën e ardhshme.

Megjithatë, drejtori sportiv i Bayernit, Max Eberl, ka bërë të qartë se klubi dëshiron ta mbajë sulmuesin kryesor.

“Jemi në bisedime me Harryn”, konfirmoi Eberl të hënën për Sky Germany.

Kjo vjen vetëm disa muaj pasi vetë Kane u distancua nga një rikthim i mundshëm në Angli.

“Jo, [nuk po e konsideroj rikthimin] për momentin. Jam shumë i lumtur këtu. Kam edhe dy vite kontratë,” kishte thënë ai shtatorin e kaluar.

“Po e shijoj çdo moment. Rikthimi nuk është pjesë e mendimeve të mia. Jam i lumtur me ekipin, me trajnerin dhe shpresojmë të vazhdojmë të kemi sukses.”

Harry Kane është golashënuesi i dytë më i mirë në historinë e Premier League me 213 gola, 47 më pak se rekordi i Alan Shearer. Pikërisht kjo ka ushqyer spekulime nëse ai do të dëshironte të rikthehej në Angli për ta thyer këtë rekord.

Ai debutoi me ekipin e parë të Tottenhamit në prill të vitit 2014 dhe kaloi më shumë se nëntë vite në Londrën e Veriut, periudhë gjatë së cilës ishte objekt i ofertave të shumta nga Manchester City i Pep Guardiolës.

Kane nuk arriti të fitonte asnjë trofe me Spurs, por u shpall kampion i Bundesligës sezonin e kaluar me Bayernin, nën drejtimin e Vincent Kompany, si dhe fitoi Superkupën e Gjermanisë në gusht 2025.

Statistikat e tij në Mynih janë mbresëlënëse: 119 gola dhe 30 asistime në 126 paraqitje në të gjitha garat.

Bayern Munich po ecën me hap të sigurt drejt një tjetër titulli kampion këtë sezon, duke udhëhequr Bundesligën me tetë pikë avantazh ndaj Borussia Dortmundit. Sezonin e kaluar, bavarezët u eliminuan në çerekfinale të Ligës së Kampionëve nga Interi, që më pas arriti në finale./Arbresh.info