Federata e Futbollit të Marokut paralajmëron se do të ndërmarrë veprime ligjore për Sengalin në FIFA dhe CAF

19:00 | 19 Janar 2026
D.H

Finalja e Kupës së Afrikës mes Senegalit dhe Marokut shkaktoi një tërmet me përmasa të jashtëzakonshme: goli i anuluar i Senegalit në minutat shtesë, penalltia e dhënë më pas në favor të Marokut, tërheqja e “Luanëve të Terangës” nga fusha, penalltia e humbur nga Brahim Díaz dhe supergoli i Pape Gueye që i rrëmbeu Kupën vendasve.

Reagimi i “Luanëve të Atlasit” nuk ka munguar. Federata Marokene e Futbollit ka kundërsulmuar me një komunikatë të ashpër, në të cilën kërcënon se do ta denoncojë Senegalin pranë FIFA-s dhe Konfederatës Afrikane të Futbollit (CAF).

Sipas tyre, ngjarjet pas penalltisë kanë ndikuar në “zhvillimin normal të ndeshjes”.

“Federata Mbretërore Marokene e Futbollit njofton se do të ndërmarrë veprime ligjore pranë Konfederatës Afrikane të Futbollit (CAF) dhe FIFA-s në lidhje me tërheqjen e përfaqësueses së Senegalit nga finalja kundër Marokut dhe ngjarjet që pasuan vendimin e arbitrit për të akorduar një penallti, e konsideruar e saktë nga të gjithë ekspertët. Kjo ndikoi ndjeshëm në zhvillimin normal të ndeshjes dhe në performancën e lojtarëve”, thuhet në fillim të komunikatës zyrtare të FRMF-së.

“Po ashtu, Federata Mbretërore Marokene e Futbollit shpreh falënderimet e saj të sinqerta për të gjithë tifozët marokenë që qëndruan besnikë ndaj kombëtares, me praninë e tyre masive dhe mbështetjen shembullore në të gjitha ndeshjet dhe turnetë e ekipit kombëtar. Federata falënderon gjithashtu të gjithë ata që kontribuan në suksesin e këtij kampionati kontinental”, përfundon komunikata.