Moti i keq i shkaktuar nga stuhia Claudia vrau tre persona dhe lëndoi dhjetëra të tjerë në Portugali, thanë autoritetet atje të shtunën, ndërsa në Britani të Madhe, ekipet e shpëtimit po organizonin evakuime për shkak të përmbytjeve të mëdha në Uells dhe Angli.

Portugalia dhe pjesë të Spanjës fqinje janë përballur me ditë të tëra kushtesh ekstreme të shkaktuara nga stuhia Claudia, e cila kishte arritur në pjesë të Britanisë dhe Irlandës deri të shtunën.

Punonjësit e kërkim-shpëtimit gjetën trupat e një çifti të moshuar brenda shtëpisë së tyre të përmbytur në Fernao Ferro, matanë lumit Tagus në Lisbonë, të enjten. Me sa duket, ata ishin duke fjetur dhe nuk kishin mundur të iknin ndërsa uji u rrit gjatë natës.

Të shtunën, një tornado goditi Albufeiran në Portugalinë jugore, thanë shërbimet e emergjencës.

Pamjet e filmuara nga distanca që u postuan në internet treguan tornadon duke dëmtuar dhe shkatërruar karvanët në një zonë kampingu, ku komandanti rajonal i mbrojtjes civile, Vitor Vaz Pinto, tha se një grua 85-vjeçare britanike u vra.

Njëzet e tetë persona u lënduan në një hotel aty pranë, tha ai, duke shtuar se dy prej tyre ishin në spital me lëndime të rënda.