Papa Leoni XIV ka humbur mbështetjen e shumë katolikëve konservatorë pas një deklarate kritike ndaj politikave të emigracionit të presidentit amerikan, Donald Trump.

Gjatë një deklarate për mediat, Papa Leoni u shpreh: “Nuk e di nëse mund të quhesh pro-jetë, nëse je kundër abortit, por mbështet trajtimin çnjerëzor të emigrantëve”.

Kjo deklaratë ka shkaktuar reagime të forta nga figura konservatore, të cilët më herët kishin mbështetur Papën për qëndrimet e tij tradicionale, raporton Reuters.

Disa e akuzuan për krijimin e “konfuzionit moral”, ndërsa Shtëpia e Bardhë e hodhi poshtë vlerësimin e tij si të pasaktë.

Zyrtarë të Vatikanit thanë se Papa Leoni nuk pritet të tërhiqet nga qëndrimet e tij, pasi ai i jep rëndësi të madhe çështjeve humanitare dhe mbrojtjes së emigrantëve.

Papa Leoni është Papa i parë amerikan dhe u zgjodh në maj 2025, duke fituar fillimisht simpatinë e të djathtës katolike për rikthimin e traditave kishtare.