Publiku në Portugali është në shok, pasi 15 persona humbën jetën dhe të paktën 23 të tjerë u plagosën, kur një nga atraksionet më të njohura turistike në Lisbonë, funikulari Gloria, doli nga shinat dhe u përplas me një ndërtesë. Pesë nga të plagosurit ndodhen në gjendje jashtëzakonisht të rëndë, sipas Ministrisë së Shëndetësisë së Portugalisë.

Mes viktimave kishte edhe shtetas të huaj, por autoritetet nuk kanë konfirmuar ende identitetin e tyre. Aksidenti ndodhi rreth orës 18:05, me orën lokale.

Kryetari i Bashkisë së Lisbonës, Carlos Moedas, vizitoi të plagosurit në spital mbrëmjen e së mërkurës dhe e quajti ngjarjen “një moment trishtimi të madh për qytetin”.

Qeveria portugeze shpalli një ditë zie kombëtare dhe njoftoi se kryebashkiaku do të pritet në një mbledhje të posaçme të kabinetit ditën e enjte.

Presidenti i Portugalisë, Marcelo Rebelo de Sousa, shprehu ngushëllimet dhe solidaritetin e tij të thellë me familjet e viktimave.

Presidentja e Komisionit Evropian, Ursula von der Leyen, dhe kryeministri spanjoll, Pedro Sánchez, reaguan gjithashtu, duke e quajtur aksidentin “të tmerrshëm” dhe duke shprehur mbështetjen e tyre për popullin portugez.

Hetimi ka nisur

Policia dhe autoritetet e tjera kaluan disa orë në vendngjarje. Është nisur një hetim zyrtar nga Agjencia Kombëtare e Sigurisë së Transportit, policia dhe kompania përgjegjëse për operimin e funikulareve në Lisbonë.

Drejtori i kompanisë Carris, e cila administron transportin publik në kryeqytet, vizitoi vendin e aksidentit mbrëmjen e së mërkurës. Në një deklaratë për media, kompania tha se funikulari ishte i mirëmbajtur rregullisht, përfshirë shërbime të plota çdo katër vjet, kontrollime teknike çdo dy vjet, si dhe inspektime mujore, javore dhe ditore.

Megjithatë, dëshmitarët okularë kanë deklaruar se sistemi i frenimit dështoi, duke bërë që funikulari të rrëshqasë poshtë një rruge të pjerrët dhe të përplaset me një ndërtesë.

Ende nuk është e qartë se sa persona ndodheshin në bord në momentin e aksidentit, por dihet se funikulari mbante më shumë se 40 pasagjerë.

Çfarë dihet deri më tani?

Në rrjetet sociale janë publikuar video që tregojnë teleferikun e verdhë të përmbysur, pothuajse plotësisht të shkatërruar, ndërsa njerëzit vrapojnë në panik dhe tymi ngrihet mbi ndërtesat përreth.

Një dëshmitar i tha mediave portugeze se “funikulari ishte plotësisht jashtë kontrollit, sikur frenat të mos funksiononin fare.”

“Të gjithë filluan të vraponin, sepse menduam se do të godiste një teleferik tjetër më poshtë. Por në një kthesë, funikulari doli nga shinat dhe u përplas direkt me një ndërtesë,” shtoi ai.

Një tjetër dëshmitar tha: “Po zbriste me shpejtësi të madhe poshtë rrugës së pjerrët dhe u përplas me ndërtesën, duke u shpërbërë si një kuti kartoni e shkelur.”

Autoritetet e Lisbonës kanë deklaruar se është shumë herët për të nxjerrë përfundime për shkakun e aksidentit. Ndërkohë, portali Observador raportoi se gjatë udhëtimit, litari që tërhiqte funikularin u lirua, gjë që shkaktoi humbjen e kontrollit dhe përplasjen fatale.

Funikulari Gloria – një simbol i Lisbonës

Një funikular është një sistem hekurudhor që shërben për ngjitjen dhe zbritjen në shpate të pjerrëta, ku dy automjete lëvizin në drejtime të kundërta – njëri zbret, tjetri ngjitet – nëpërmjet një sistemi me kabllo dhe motorë elektrikë.

Gloria është një nga atraksionet më të njohura turistike në Lisbonë dhe një simbol i kryeqytetit portugez. Ai ka qenë në funksion që nga viti 1885, ndërsa elektrifikimi i tij u bë në fillim të shekullit të 20-të.

Teleferikët e verdhë të Lisbonës janë imazhe ikonike të qytetit, shpesh të fotografuar teksa përshkojnë rrugët me kalldrëm dhe të pjerrëta të qendrës historike.

Funikulari Gloria mbulon një itinerar 275 metra të gjatë, dhe udhëtimi zgjat rreth 3 minuta. Megjithëse përdoret edhe nga banorët vendas, ai është veçanërisht popullor tek turistët.