Kryeministri i Kosovës, Albin Kurti, ka folur për marrëdhënien e tij me Kryeministrin e Shqipërisë, Edi Rama.

Ai pati një vizitë në dy komuna të Maqedonisë së Veriut, ku edhe dha një intervistë për televizionin lokal “Koha TV”, shkruan Arbresh.info.

Kurti tha se marrëdhëniet e tij me homologun e tij nga Shqipëria janë të mira, por ka edhe mospajtime.

“Kemi raporte korrekte, raporte të mira. Është çështje e përgjegjësive institucionale që kemi, por edhe politike e kombëtare, por kjo s’do të thotë që nuk kritikohemi ose që nuk kemi mospajtime asnjëherë për asnjë gjë. Besoj që kritikat janë pjesë e demokracisë dhe ato duhet të jenë konstruktive. Është për të ardhur keq që më 14 qershor nuk u mbajt mbledhja e dy qeverive, që u përgatit muaj më parë, por anulimin e saj nuk e kemi bërë ne, përkundrazi ne i kemi bërë të gjitha përgatitjet. Është mirë që të mos pritet mbledhja e ardhshme që të nënshkruhen ato marrëveshje, që më në fund u bë nga Tirana zyrtare përveçse nga Prishtina”, tha Kurti.

Kryeministri i Kosovës ka vizituar dy komunat në Maqedoni të Veriut, atë të Çaririt dhe të Tetovës, ai ishte i shoqëruar nga kryetari i Tetovës, Bilall Kasami, dhe ka marrë pjesë në manifestimin mirëseardhës që u organizua për nder të tij, në sheshin “Iliria”./Arbresh.info/