Sipas Organizatës Botërore të Shëndetësisë, 33 vende kanë raportuar 920 raste të mundshme të hepatitit akut të rëndë tek fëmijët deri me tani, me një rritje prej 270 raste nga muaji maj.

OBSH tha se Europa përbën gjysmën e rasteve të mundshme duke përfshirë 267 raste në Britani të Madhe, ndërsa një e treta e rasteve janë në SHBA, transmeton portal arbresh.info

Autoritetet shëndetësore globalisht kanë hetuar rritjen misterioze të rasteve të rënda të hepatitit, ose inflamacionit të mëlçisë, te fëmijët e vegjël. Përhapja u raportua për herë të parë në prill në Britani dhe që atëherë ka goditur dhjetëra vende të tjera.

Zyrtarët e shëndetësisë në SHBA thonë se infeksioni me adenovirus, një virus i zakonshëm i fëmijërisë, është hipoteza kryesore për rastet.

Të dhënat e fundit të OBSH-së ishin që nga 22 qershori dhe përjashtuan katër vende me raste të raportuara ende për t’u klasifikuar.

Sipas raportit, nga 422 rastet në të cilat disponohen informacione lidhur me gjininë dhe moshën, afërsisht gjysma kanë ndodhur te meshkujt, me shumicën e tyre nën moshën 6-vjeçare.

OBSH tha se 45 fëmijë me hepatit akut kanë kërkuar transplantim të mëlçisë dhe ka pasur 18 vdekje, shumica e tyre në rajonin e Amerikës./reuters/arbresh.info/