Gjykata Themelore në Prishtinë njofton se Departamenti për Krime të Rënda ia ka caktuar masën e paraburgimit prej një muaji të pandehurit me inicialet N.S., i cili dyshohet se ka vrarë djalin e tij në fshatin Peran të Podujevës.

Sipas njoftimit të gjykatës, i pandehuri dyshohet për dy vepra penale; “Vrasje e rëndë” dhe “Mbajtja në pronësi, kontroll ose posedim të paautorizuar të armëve”.

“Gjyqtari i procedurës paraprake, me rastin e vlerësimit të rrethanave për caktimin e masës së paraburgimit vlerësoi se me ndonjë masë tjetër alternative, nuk mund të arrihet zhvillimi i suksesshëm i procedurës penale, përkatësisht shmangien e rrezikut për ikje si dhe ndikimi në deklarimet e dëshmitarëve dhe mbledhjen e provave materiale në këtë çështje penale”, thuhet në komunikatën për media.

Ndryshe, ngjarja e rëndë ka ndodhur të hënën rreth orës 18:00.

Dyshohet se shkak ishte një mosmarrëveshjeje rreth pronës mes të dyshuarit  dhe viktimës.

Dyshohet se viktima ka marrë për të punuar tokën e një fqinji të tij, me të cilin dorasi i dyshuar ka pasur më parë një konflikt.

Megjithatë, zyrtarisht ende nuk është sqaruar se cili ka qenë motivi që dyshohet se shtyu prindin të shkrepë armën mbi djalin e tij.

Sidoqoftë, vrasja ka ndodhur në një arë, që ndodhet afër shtëpisë së tyre, në lagjen “Ismajli” në fshatin Bajqinë.

Këtë fshat dhe fshatin tjetër, Peran, i ndanë vetëm rruga.

Lidhur me këtë rast tragjik ka reaguar edhe kryetari i Podujevës, Shpejtim Bulliqi.

“Rasti i vrasjes në Peran të Podujevës na ka tronditur të gjithëve.

Duke u lutur që të jetë i fundit ky rast i vrasjes, ngushëllime familjes dhe miqve!”, ka shkruar Bulliqi në Facebook. /Telegrafi/