Ambasadori palestinez në Serbi, Mohammed Nabhan, ka deklaruar se qëndrimi i Palestinës për Kosovën nuk po ndryshon dhe se fakti që ministrja e Jashtme e Kosovës, Donika Gërvalla u takua së fundi me ministrin e Jashtëm të Palestinës, Riyad Balki, nuk ka të bëjë me ndonjë ndryshim qëndrimi rreth çështjes së Kosovës.

Bëhet fjalë për një takim që Gërvalla dhe ministri palestinez e zhvilluan në kuadër të Forumit të Antalias për Diplomaci.

“Fakti që ministri u takua në një qytet turk nuk do të thotë asgjë për ne dhe nuk do të thotë ndryshim qëndrimi”, tha Nabhan për Kosova-online .

Poashtu ai tha se Palestina, kur bëhet fjalë për Kosovën, udhëhiqet nga dy parime, e që siç deklaroi ai, janë respektimi i Rezolutës 1244 të OKB-së dhe avokimi për negociata në mes Prishtinës dhe Beogradit.

“Kjo zonjë nuk e di mirë se çfarë do të thotë Jerusalemi për Palestinën dhe arabët. Duhet të dijë pozicionin e Palestinës, myslimanëve dhe të krishterëve palestinezë dhe vetëm atëherë të thotë diçka për këtë”, u shpreh Nabhan, duke përsëritur se çështja e Jerusalemit për Palestinën është një vijë e kuqe që askush nuk mund ta kalojë.