Ish-presidenti i SHBA Donald Trump tha se mund të vizitojë kufirin e SHBA-së me Meksikën, ku po zhvillohet kriza e migrantëve.

“Dikush duhet ta bëjë këtë,” tha Trump, duke aluduar në faktin se askush nga zyrtarët e administratës së presidentit aktual, Joe Biden nuk shkoi në kufi.

Trump, qëllimi kryesor i të cilit ishte të parandalonte migrimin e paligjshëm nga Meksika, e cila është arsyeja pse filloi ndërtimin e një muri në kufi, kritikoi vazhdimisht politikën e Joe Bidenit, i cili ndaloi financimin e ndërtimit të murit dhe lehtësoi hyrjen e migrantëve, pas së cilës mijëra arritën në Shtetet e Bashkuara.

Në një intervistë me Fox News, Trump i kërkoi administratës së Bidenit të vazhdojë ndërtimin e murit.

“Mijëra dhe mijëra njerëz po vijnë në kufi ndërsa flasim. Ne do të kemi miliona njerëz që mbërrijnë në Shtetet e Bashkuara. Dhe kjo do të shkatërrojë vendin tonë”, tha Trump.

Ai përsëriti kritikat ndaj administratës së presidentit të ri, “Unë nuk e di se çfarë po bëjnë dhe ata nuk e dinë se çfarë po bëjnë. Është një situatë shumë e rrezikshme. Do të doja të mos kisha nevojë të përfshihesha, dikush tjetër duhet ta bëjë këtë”, tha ai.

Trump deklaroi se ndërtimi i murit ishte afër përfundimit dhe se u deshën vetëm disa javë se të ndërtohej. /Telegrafi/