Zv/sekretari tashmë i shkarkuar i Federatës së Futbollit të Kosovës, Arianit Ahmeti, pas disa ditëve në heshtje, ka dhënë një intervistë për Zëri.info.

Duke folur për zhvillimet e fundit, Ahmeti ndër të tjera ka përmendur edhe rastin e largimit të djalit të legjendës së futbollit kosovar, Fadil Vokrri, Gramozit, nga FFK’ja.

Sipas Ahmetit, ish-kryetari i Hysit, të cilin ai e quan biznesmen, Hysen Sadiku, ka provuar të negociojë një pozitë për Gramozin në FFK.

“Djali i Fadil Vokrrit, unë e di shumë mirë këtë histori dhe kam qenë aty. Ai së bashku me një biznesmen Hysin (Hysen Sadiku, ish-pronar i klubit KF Hysi që është shuar) dhe është ndërmjetësuar për një pozitë në FFK. Kishte mos-pajtime për një pozicion që Gramozi e ka kërkuar. Ndoshta Agim Ademi nuk ka dashur dhe nuk ka gjetur vullnet për atë pozitë duke u thirrur në një organogramin e FFK-së se nuk ekziston.

Agim Ademi gjatë një konference për media bashkë me Ahmetin
Të them të drejtën, prej se jam në Federatë nuk kam parë asnjë organogram. E kam dëgjuar Erollin duke thënë se ka organogram, por nuk e di që ka, unë nuk e kam parë”, u shpreh Ahmeti.

Ndryshe, ishte vetë Ahmeti ai i cili vitin e kaluar e arsyetoi vendimin e FFK’së në një konferencë për media, çuditërisht duke u thirrur në organogramin që vitin e kaluar kishte ekzistuar në FFK, shkruan Gazeta Olle.

“Gramozit i janë ofruar pesë poste. Ka kërkuar që titulli i pozitës së tij të jetë Drejtor Gjeneral, të cilën e ka gjetur në organoprogramin e Federatës së Futbollit të Francës, por të cilën ne nuk e kemi. Për hir të korrektësisë, Sahit Kelmendin e kam familjar dhe ato akuza nuk qëndrojnë. Pikërisht Sahiti ka qenë me mua dhe persona të tjerë të afërm të Gramozit”, ishte shprehur Ahmeti.