RTK paralajmëron protesta për mos miratimin e Ligjit të ri në Kuvend

17:36 | 21 Dhjetor 2018
Arbresh.info

Sindikata e Punëtorëve e RTK-së shpreh zhgënjim të thellë me mosmiratimin e ligjit për Mediumin Publik në vend, RTK-në, nga Kuvendi i Kosovës. Sindikata kërkon nga Kuvendi i Kosovës që ta rikthejë në votim ligjin e ri të RTK-së, në të kundërtën, RTK rrezikon të futet në krizë të thellë dhe të pariparueshme, thuhet në njoftimin për media.

“Kërkojmë urgjentisht që ligji i ri për RTK-në të miratohet këtë vit dhe po ashtu u bëjmë thirrje edhe njëherë deputetëve që të mos e lidhin fatin e RTK-së me individë dhe t’i lënë anash interesat partiake e ta miratojnë ligjin e ri të RTK-së.

SPERTK gjatë javës së ardhshme do t’i njoftojë mediet me ditën se kur do të fillojë me protesta”, përfundon njoftimi.