Ministri i Punëve të Brendshme, Bejtush Gashi, po qëndron për një vizitë dyditore në Shqipëri.

Gjatë ditës së sotme, Gashi është pritur në takim nga Presidenti i Shqipërisë, Ilir Meta.

Në këtë takim u bisedua lidhur me rëndësinë e bashkëpunimit mes Kosovës dhe Shqipërisë por edhe shteteve të tjera të rajonit, në luftën kundër terrorizmit dhe krimit të organizuar si dhe krijimin e një klime sa më të mirë dhe të sigurt për të gjithë rajonin.

Gjithashtu, gjatë takimit me theks të veçantë u bisedua për bashkëpunimin mes dy vendeve në fushën e Emergjencave Civile, njofton Klan Kosova.

Meta shprehu kënaqësinë e veçantë për rekomandimin pozitiv që Komisioni Evropian ka dhënë për liberalizimin e vizave për qytetarët e Kosovës dhe tha se pret me kënaqësi që edhe Parlamenti Evropian dhe Këshilli të miratojnë sa më parë këtë rekomandim.

Gashi e falënderoi Metën për përkrahjen e vazhdueshme nga ana e Shqipërisë për Kosovën në rrugën e saj drejt integrimit në Bashkimin Evropian.

Gashi dhe homologu i tij shqiptar Fatmir Xhafaj nesër do të nënshkruajnë Protokoll bashkëpunimi gjatë sezonit turistik veror, në pikat e kalimit kufitar.