Kryetari i Serbisë, Aleksandar Vuçiq, në vigjilje të Samitit të procesit të Berlinit, që po mbahet në Londër, ka biseduar me kancelaren Merkel, të cilën e luti që të ndikojë në përshpejtimin e realizimit të projektit të Zonës ekonomike regjionale dhe autostradën Nish-Prishtinë.

Vuçiqi, përmes bisedës telefonike që zhvilloi me Merkelin, theksoi se Zona ekonomike regjionale dhe ndërtimi i autostradës Nish-Prishtinë do të kenë rëndësi për Ballkanin Perëndimor, njoftojnë mediet serbe, transmeton televizioni publik.

Tutje, Vuçiqi vlerësoi si të një rëndësie të veçantë për Serbinë dhe rajonin, krijimin e Zonës ekonomike rajonale, ngase kështu do të rriteshin investimet dhe të përshpejtohej rrjedha e njerëzve, mallrave, kapitalit dhe shërbimeve.

Vuçiçi dhe Merkeli diskutuan gjithashtu për vazhdimin e dialogut Beograd-Prishtinë dhe ranë dakord që dialogu është i nevojshëm për ruajtjen e paqes, si dhe arritja e një zgjidhjeje kompromisi është vendimtare për të dyja palët.