Policia e Kosovës ka arrestuar një person nën dyshimin se ka qenë i përfshirë në disa vjedhje serike të automjeteve në disa lokalitete të Kosovës.

I dyshuari, A.M, 19 vjeçar është arrestuar nga policia në aksin rrugor Lipjan -Prishtinë, në momentin kur po udhëtonte me veturën për të cilën në stacionin policor të Ferizajt ishte raportuar si e vjedhur.

“Pas informatës se policia në Lipjan, në aksin rrugor, Lipjan – Prishtinë, kishte hasur në një veturë ‘Pick Up’ , e cila në stacionin policor të Ferizajt ishte raportuar e vjedhur, policia ka ndërmarr të gjitha veprimet e duhura, duke arrestuar të dyshuarin nën dyshimin e bazuar se i njëjti kishte kryer veprën e përshkruar penale”, ka thënë zëdhënësi rajonal i policisë në Ferizaj, Agim Gashi

Bëhet e ditur se gjatë intervistimit të të dyshuarit, hetuesit kanë arritur t’i ndriçojnë edhe disa vepra penale të vjedhjes dhe vjedhjes së rëndë të kryera nga ky i dyshuar, në zona të ndryshme, si në Kraishtë të Lipjanit dhe në rrethinë të Ferizajt.

“Hetuesit e Ferizajt, gjithashtu zbuluan se po ky i dyshuar, e kishte vjedhur edhe një kamionetë në komunën e Fushë Kosovës. Në kuadër të bashkëpunimit shumë të mirë të ndërsjellë, policia e Ferizajt, i ka njoftuar stacionet policore respektive, lidhur me këto vepra penale”, ka thënë Gashi

Ndërkohë mësohet se ndaj të dyshuarit, prokurori ka caktuar masën e ndalimit për 48 orë.