Administrata Tatimore e Kosovës gjatë ditëve të fundit ka mbyllur së paku 13 objekte të lojërave të fatit në komunën e Prishtinës, në Fushë Kosovë, Lipjan dhe në Gjakovë si të jashtëligjshme dhe në afërsi të shkollave.

Katër prej tyre të enjten, janë mbyllur vetëm në qytetin e Lipjanit, njofton korrespondenti i Kohës Ditore nga regjioni i Ferizajt.

Valentina Bytyqi, zyrtare për komunikim me media në Administratën Tatimore të Kosovës, ka thënë se gjatë ditëve të fundit inspektorët e ATK-së kanë qëndruar në terren në qytetin e Prishtinës, në Fushë Kosovë, Lipjan dhe në Gjakovë, ndërkohë në fund të javës do të dalin me një komunikatë zyrtare lidhur me aksionet e realizuara.

“Përveç aksionit në Lipjan të enjten, ATK-ja edhe në ditët e kaluar ka realizuar një aksion dhe ka mbyllur edhe 9 pika të tjera të lojërave të fatit në, Gjakovë, Prishtinë, Fushë Kosovë dhe Lipjan”, ka thënë Bytyqi.