Humbja e Gert Wildersit në Holandë e frenoi hovin e populizmit, por nuk dihet sesa do të përsëritet edhe në Francë qëndrimi i votuesve pro establishmentit.

Për presidentin e Parlamentit Europian, Antonio Tajani, vetëm një strategji mund të zbatohet në rast se pushtetin e merr Fronti Nacional; ajo është të reagosh përpara  popullit. t’i japësh përgjigje, të zgjidhesh problemet e papunësisë, emigracionit, terrorizmit.

“Ne duhet ta kuptojmë përse qytetarët votojnë për këto parti. Nëse ka shqetësim, atëherë është e qartë se ata duan t’u dërgojnë një mesazh politikanëve dhe partive të tjera. Prandaj është e rëndësishme të fokusohemi tek problemet dhe jo tek forcat politike populiste. E pamë që në Holandë nuk fituan. Përse ndodhi kjo? Po sepse Kryeministri i dha popullit disa përgjigje konkrete”, tha Tajani për Euronews.

Tajani preku edhe çështjen e të drejtave të njeriut në Ballkanin Perëndimor, Europën Lindore dhe Turqi. Ai kujtoi se në Shqipëri, Bjellorusi, Maqedoni, Moldavi e Malin e Zi ka patur raste kur gazetarët janë penguar në punën e tyre dhe vëren ngërçe me minoritetet.

“Për fat të keq, pavarësisht përpjekjeve tona të forta dhe mbështetjes nga Europa, kemi vënë re se situata nuk po përmirësohet. Në fakt, raporti i komisionit për 2016-n tregon se nuk ka përparim në asnjërin nga gjashtë vendet e Ballkanit Perëndimor sa i takon lirisë së shprehjes. Shqetësimin më të madh në këtë drejtim përbën Turqia”, shtoi kreu i PE-së. Kam qenë vetë gazetar, u shpreh Presidenti i PE-së dhe e di sa e rëndësishme është të kesh liri në punën tënde.

Ai kërkoi lirimin e menjëhershëm të gazetarit gjermano-turk të Die Welt dhe atë të dhjetra reporterëve të tjerë të ndaluar në mënyrë të padrejtë.