Pep Guardiola nuk arriti t’i mbajë lotët gjatë fjalimit emocional të lamtumirës në “Etihad”, pasi drejtoi për herë të fundit Manchester Cityn.

Trajneri spanjoll, i cili kaloi 10 vite historike te klubi anglez, u përshëndet nga tifozët me emocione të mëdha pas një epoke të artë që solli trofe të shumtë dhe dominim në futbollin anglez.

Guardiola pranoi se ishte jashtëzakonisht emocional para se të fliste para tifozëve.

“Jam shumë nervoz. I tmerruar tani. Pse më doni kaq shumë? Pse ma bëni këtë?”, tha ai mes emocionesh.

Strategu spanjoll falënderoi tifozët për dashurinë që ka marrë gjatë gjithë periudhës në Manchester City.

“Kurrë nuk do ta imagjinoja sasinë e dashurisë që kam marrë këtu.”

Ai e përshkroi periudhën e tij te City si një nder të jashtëzakonshëm.

“Ka qenë një nder i pabesueshëm dhe i jashtëzakonshëm të jem trajneri juaj për 10 vite.”

Guardiola foli edhe për sukseset dhe emocionet e krijuara gjatë dekadës së tij në klub.

“Videoja e lamtumirës ishte aq e gjatë për shkak të numrit të trofeve dhe emocioneve të pabesueshme që kemi përjetuar së bashku.”

Trajneri legjendar tha se dëshiron që tifozët të mos kujtojnë vetëm trofetë.

“Do të doja që njerëzit të mos kujtojnë vetëm trofetë që fituam, por emocionet që kemi dhuruar dhe kënaqësinë që kanë ndjerë kur kanë ardhur në stadium.”

Një moment prekës ishte edhe përmendja e babait të tij, i cili ishte i pranishëm në stadium.

“Babai im është këtu në tribunë, 94-vjeçar.”

Guardiola tha se familja e tij do të mbetet gjithmonë pjesë e Manchester Cityt.

“Emri i familjes sonë do të jetë këtu për shumë e shumë vite.”

Ai falënderoi edhe lojtarët që ndërtuan suksesin e klubit, duke përmendur emra si Fernandinho, Gundogan, Ederson, John Stones dhe Bernardo Silva.

Në fund, Guardiola dha një mesazh emocional për tifozët e Cityt:

“Nëse në vitet e ardhshme më shihni në rrugë kudo në botë dhe jeni tifozë të Manchester Cityt, ejani dhe më përqafoni. Do të kem nevojë për këtë.”

“Çdo vendim që mora, e mora duke menduar se çfarë ishte më e mira për këtë klub.”

Në fund të fjalimit, Pep Guardiola mbylli gjithçka me fjalët: “Ju dua shumë”./Arbresh.info