Andy Robertson dhe Mohamed Salah i kanë dhënë fund aventurës së tyre legjendare në Liverpool, duke zhvilluar ndeshjen e fundit me fanellën e “The Reds” në barazimin 1:1 ndaj Brentford në “Anfield”, në javën e fundit të sezonit 2025/26 në Premier League.

Dyshja, që për nëntë vite ishte pjesë kyçe e suksesit të Liverpoolit, ndihmoi skuadrën të sigurojë vendin e pestë në tabelë dhe kualifikimin në Ligën e Kampionëve për sezonin e ardhshëm.

Pas ndeshjes, emocionet pushtuan stadiumin legjendar “Anfield”, ku tifozët i dhanë një lamtumirë madhështore dy futbollistëve të dashur.

Mbrojtësi skocez Andy Robertson pranoi se java e fundit ka qenë jashtëzakonisht e vështirë emocionalisht.

“Jam emocionalisht i zbrazur. Ka qenë një javë shumë e vështirë duke u munduar të kontrolloj emocionet dhe të përqendrohem te loja. Liverpooli është bërë klub ku trofetë dhe Liga e Kampionëve janë pritshmëri, jo ëndrra. Kjo është falë brezit tonë”, deklaroi Robertson për Sky Sports.

Ai falënderoi tifozët për mbështetjen e vazhdueshme gjatë viteve.

“Këta tifozë kanë qenë gjithmonë zemra e klubit. Nëse mund t’ua kthejmë sadopak dashurinë duke fituar ndeshje dhe trofe, atëherë kjo është gjëja më e vogël që mund të bëjmë.”

Robertson pati fjalë të mëdha edhe për Pep Guardiolën, duke thënë se trajneri i Manchester Cityt e ka shtyrë Liverpoolin “në limite të reja”.

“Do të kishim fituar më shumë tituj të Premier League po të mos ishte Pep Guardiola”, shtoi ai.

Edhe Mohamed Salah nuk i mbajti lotët gjatë ditës së fundit si lojtar i Liverpoolit.

“Kam qarë shumë. Ndoshta më shumë se gjatë gjithë jetës sime. Është shumë e vështirë të largohesh nga një vend si Liverpooli”, tha egjiptiani.

Salah tregoi se, megjithëse në publik shpesh duket i fortë dhe i ftohtë, brenda vetes është shumë emocional.

“Njerëzit më shohin gjithmonë si të fortë, por brenda meje e përjetoj gjithçka si një fëmijë.”

Sulmuesi legjendar tha se ai dhe Robertson kanë dhënë gjithçka për klubin.

“Ne e lamë rininë tonë këtu. Nga fillimi deri në fund ndamë gjithçka së bashku. Nuk do ta kishim ëndërruar kurrë gjithë këtë sukses, por e bëmë për këtë klub. E kthyem Liverpoolin aty ku e ka vendin.”

Në fund, Salah pati edhe një mesazh për lojtarët që do të vazhdojnë te Liverpooli:

“Tifozët nuk pranojnë asgjë më pak se maksimumin. Nuk ka rëndësi vetëm rezultati, por djersa dhe gjaku që jep në fushë. Nëse lufton për këtë fanellë, tifozët do të të duan përgjithmonë”./Arbresh.info