U bllokuan në Izrael për shkak të konfliktit me Iranin, Hasani: 3 shqiptarë mbërritën në Tiranë, një qëndron në Greqi

13:27 | 18 Qershor 2025
E.K

Një ditë pasi njoftoi për evakuimin e pesë shtetasve shqiptarë nga Izraeli pas përshkallëzimit të konfliktit me Iranin, ministri i Jashtëm i Shqipërisë, Igli Hasani ka dhënë një përditësim të situatës.

Përmes një postimi në rrjetin social Facebook, Hasani bëri të ditur se të pesë qytetarët shqiptarë kanë mbërritur të sigurt në Athinë në orët e para të mëngjesit.

“MEPJ përmes ambasadave të saj ka ndjekur me vëmendje në çdo etapë evakuimin e 5 shqiptarëve nga Izraeli, të cilët kanë mbërritur shëndosh e mirë në orët e para të mëngjesit në Athinë. 3 prej tyre kanë vazhduar rrugën dhe gjenden tashmë në Tiranë; njëri kthehet sonte në mbrëmje në Shqipëri; ndërsa personi i pestë është rezident në Greqi dhe do të qëndrojë në vendin fqinj.“, njofton Hasani në rrjetin social Facebook./Arbresh.info