Ministri i Jashtëm i Shqipërisë, Igli Hasani në një video 60 sekondashe, ka përfshinë takimin e Drejtorëve Politik të Kosovës dhe Shqipërisë ndër ngjarjet më kryesore të javës.

Të enjten e 17 Prillit një delegacion i MPJD-së i kryesuar nga Drejtor i Departamentit për Evropë, BE dhe Rajon, Mentor Tahiri janë pritur në Tiranë në ambientet e Ministrisë për Evropën dhe Punët e Jashtme të Shqipërisë nga drejtori Gazmend Barbulushi.

Në këtë takim është diskutuar rreth çështjes së bashkëpunimit dypalësh, integrimit evropian dhe bashkëpunimit rajonal.

Takimin e përshëndeti Ministri për Evropën dhe Punët e Jashtme, Igli Hasani, i cili vlerësoi bashkëpunimin e ngushtë ndërmjet dy vendeve dhe theksoi rëndësinë e koordinimit të vazhdueshëm ndërinstitucional.

“Sot, në mjediset e #MEPJ u zhvillua takimi ndërmjet Drejtorëve politikë të Ministrisë së Jashtme të Republikës së Shqipërisë dhe asaj të Republikës së Kosovës, që mbulojnë çështjet e bashkëpunimit dypalësh, çështje të bashkëpunimit rajonal dhe të integrimit në BE”.

”Takimi mes delegacioneve vijoi me një bashkëbisedim frytdhënës lidhur edhe me përcaktimin konkret të hapave e aktiviteteve në vijim, si në kontekstin e bashkëpunimit dypalësh dhe në atë rajonal e shumëpalësh. Forcimi i subjektivitetit të Kosovës përmes njohjeve të reja dhe përforcimi i rolit të saj në strukturat rajonale, ishte pjesë e diskutimeve mes delegacioneve”, thuhet ndër të tjera në njoftimin e Ministrisë për Evropën dhe Punë të Jashtme të Shqipërisë.