Prokuroria Speciale e Republikës së Kosovës (PSRK) ka arrestuar nëntë persona për keqpërdorim të pozitës zyrtare apo autoritetit shtetëror.

Në komunikatën e PSRK-së bëhet e ditur se të arrestuarit si anëtarë të Komisionit teknik kishin mashtruar kinse janë kryer punimet e stadiumit të futbollit në fshatin Magure të Lipjanit, sipas kontratës së fituar nga kompania kontraktuese, përcjell arbresh.info.

Ndër të arrestuarit është edhe përgjegjësi i kompanisë në fjalë, e, gjithë të arrestuarit, i kanë bërë dëm buxhetit të komunës së Lipjanit plot 300 mijë euro.

Komunikata e plotë:

Arrestohen nëntë persona për keqpërdorim të pozitës apo autoritetit dhe për mashtrim

Prishtinë, 23 janar 2023 –  Prokuroria Themelore në Prishtinë –Departamenti për Krime të Rënda, respektivisht Njësiti për Krime Ekonomike dhe Korrupsion, njofton opinionin publik se gjatë ditës së sotme Policia e Kosovës, ka arrestuar nëntë (9) persona, të dyshuar se kanë kryer veprën penale ‘’Keqpërdorimi i pozitës apo autoritetit’’ dhe veprën penale të ‘’Mashtrimit’’ nga neni 336 të Kodit Penal të Kosovës.

Prokuroria Themelore në Prishtinë, njofton se personat e arrestuar në cilësinë e personave zyrtar, si anëtarë të Komisionit teknik kanë bërë pranimin e punimeve të stadiumit futbollistik në fshatin Magure Komuna e Lipjanit, kinse janë kryer punimet sipas kontratës së fituar nga një kompani.

Po ashtu, gjatë këtij aksioni është ndaluar edhe një (1) person, përgjegjës i Kompanisë në fjalë. Ndërkaq, personat e lartcekur me këto veprime dyshohet se i kanë shkaktuar dëme buxhetit komunal në vlerë rreth treqind mijë (300.00) euro.