Turqia e Armenia nisin bisedime në Rusi, pajtohen për vazhdimin e tyre

16:21 | 14 Janar 2022

Përfaqësuesit e Armenisë dhe Turqisë janë pajtuar që t’i vazhdojnë bisedimet gjatë rundit të parë të negociatave, që e zhvilluan të premten në Moskë me qëllim të normalizimit të marrëdhënieve pas disa dekadave armiqësi.

Ruben Rubinian, zëvendëskryetar i Kuvendit të Armenisë, dhe Serdar Kilic, ish-ambasador i Turqisë në Shtetet e Bashkuara, u pajtuan gjatë takimit të parë në kryeqytetin rus se Turqia dhe Armenia duhet të punojnë për t’i rregulluar raportet përmes dialogut dhe pa parakushte, tha Ministria e Jashtme e Armenisë.

“Data dhe vendi i takimit të dytë do të përcaktohet përmes kanaleve diplomatike”, tha kjo ministri, raporton Radio Evropa e Lirë.

Para bisedimeve, ministria armene tha se pret që bisedimet të rezultojnë në themelimin e marrëdhënieve diplomatike me Turqinë dhe hapjen e kufirit mes dy vendeve.

Muajin e kaluar, Armenia e largoi bllokadën ndaj prodhimeve turke, që ishte ngarkesë kryesisht për armenët, ndërsa Turqia njoftoi se do të lejohen fluturimet “charter” për në Armeni.

Raportet mes Armenisë e Turqisë kanë qenë historikisht të ndërlikuara shkaku i vrasjes së armenëve më 1995. Fitorja e Armenisë në konfliktin e viteve 90’ me Azerbajxhanin për Nagorno-Karabakun e kishte nxitur Turqinë që ta mbyllte kufirin në vitin 1993 për t’i përkrahur azerët, me të cilët turqit kanë lidhje kulturore e historike.

Lajmet më të lexuara