Një tërmet historikisht i fuqishëm goditi bregun veriperëndimor të Kubës të hënën, sipas raporteve zyrtare, duke prekur pjesë të ishullit, Meksikës dhe Floridës që zakonisht nuk janë të prirura për tërmete.

Shërbimi Gjeologjik i SHBA-së (USGS) mati tërmetin me një magnitudë prej 6.1 ballë në një thellësi të cekët prej 26 km me një epiqendër 104 km në perëndim-veriperëndim të vendbanimit të Mantuas, Kubë, rreth katër orë me makinë nga kryeqyteti Havana.

Tërmeti i së hënës ishte i pazakontë për këtë pjesë të Karaibeve, tha Paul Earle, një sizmolog në USGS, duke vënë në dukje se tërmeti goditi brenda një pllake tektonike, ku dridhjet zakonisht janë më pak të përqendruara dhe më pak të shpeshta sesa kur ndodhin përgjatë kufijve të pllakave.

“Një tërmet i kësaj magnitude nuk ka goditur brenda 200 miljeve (322 km) nga ai i së hënës që nga viti 1880, kur një tërmet me magnitudë 6.0 goditi San Cristobal, Kubë”; tha Earle.

Autoritetet ende nuk kanë raportuar ndonjë dëmtim të madh ose viktima, por tërmeti ka ngjallur shqetësim në ishull, ku ndërtesat janë tashmë në gjendje të keqe për shkak të dekadave të krizës ekonomike.

Ndërprerjet e rregullta të energjisë elektrike kanë penguar gjithashtu komunikimet. “Ndihej vërtet i fortë. Nuk kam ndjerë kurrë diçka të tillë,” tha Yusmila Hernandez,

44 vjeç, nga shtëpia e saj në Pinar del Rio, Kubën perëndimore.

“Njerëzit po vraponin jashtë, të gjithë ishin të frikësuar… As nuk mund ta shpjegoj.” Ishte sikur një tërmet të mos kishte ndodhur kurrë më parë këtu, tha Hernandez.

USGS raportoi se dridhja u ndje edhe në Florida. Në Meksikë, tërmeti u ndje në vendpushimet turistike të Cancun, Playa del Carmen dhe Tulum në Gadishullin Jukatan. Banorët dhe punëtorët në qendër të Cancun, të cilët nuk janë mësuar me tërmete të forta, evakuuan ndërtesat e tyre.

Protokollet e emergjencës u aktivizuan në shtetet meksikane të Jukatanit dhe Quintana Roo, por ende nuk ka raportime për dëme, thanë guvernatorët e shteteve në mediat sociale.

Sipas Shërbimit Kombëtar të Motit të SHBA-së, nuk u lëshua asnjë paralajmërim ose alarm për cunami pas tërmetit.