Erdoğan: Turqia dhe Franca mund të kontriubojnë në stabilitetin e botës

23:46 | 2 Mars 2021

Presidenti i Turqisë, Recep Tayyip Erdoğan, në një takim përmes video-konferencës me homologun e tij francez, Emmanuel Macron, ka deklaruar se bashkëpunimi midis Turqisë dhe Francës mund të kontribuojë shumë në sigurinë, stabilitetin dhe përpjekjet e paqes në botë, transmeton Anadolu Agency (AA).

Siç njofton Drejtoria e Komunikimeve e Turqisë, në takim presidenti Erdoğan tha se, “Si dy aleatë të fortë të NATO-s, ne mund të japim kontribute të rëndësishme për paqen, stabilitetin dhe përpjekjet për paqe në një gjeografi të gjerë, nga Evropa në Kaukaz, Lindje të Mesme dhe Afrikë”.

Erdoğan vuri në dukje se viti 2021 shënon 100-vjetorin e Marrëveshjes së Ankarasë, e cila është baza e marrëdhënieve dypalëshe turko-franceze dhe shtoi se të dy vendet kanë “potencial serioz bashkëpunimi”.

Erdoğan po ashtu tha se të dy vendet mund të ndërmarrin hapa të përbashkëta për të luftuar terrorizmin, duke theksuar se rreziku kërcënon të dy vendet dhe njerëzit e tyre.

“Ne shpresojmë se Turqia dhe Franca të mund të veprojnë në solidaritet për të gjitha këto çështje”, tha ai.

Lajmet më të lexuara