Kryeshefi Ekzekutiv i ndërmarrjes Trepça Sh.A. ka marrë vendim për largimin e përkohshëm nga puna të pesë punonjësve në Njësinë Biznesore “Minierat me Flotacion Kishnicë dhe Artanë”.

Sipas vendimit me nr. prot. 5245, punonjësit janë pezulluar përkohësisht nga puna duke filluar nga 8 qershori 2026, deri në marrjen e vendimit përfundimtar nga Komisioni Disiplinor.

Ky vendim është marrë pas dyshimeve se punonjësit janë evidentuar si të angazhuar në punë gjatë ditëve të vikendit, ndonëse dyshohet se nuk kanë qenë të pranishëm në vendin e punës.

Në njoftim theksohet se ekziston dyshimi për shkelje të rënda të detyrave të punës, në bazë të rregullores së brendshme për përgjegjësinë disiplinore dhe materiale të punonjësve të Trepçës.

Rasti pritet të trajtohet më tej nga Komisioni Disiplinor, i cili do të vendosë për hapat e ardhshëm ndaj punonjësve të përfshirë.