Presidenti i FIFA-s, Gianni Infantino, është denoncuar zyrtarisht në Francë nga ish-presidenti i UEFA-s, Michel Platini, në një zhvillim të ri që trondit botën e futbollit ndërkombëtar.

Sipas raportimeve, Platini ka autorizuar avokatët e tij në Paris të paraqesin një denoncim penal kundër Infantinos dhe disa funksionarëve zviceranë të futbollit, si dhe përfaqësuesve të prokurorisë, duke i akuzuar për organizim komploti dhe abuzim me influencën.

Ai pretendon se akuza të rreme janë përdorur për ta penguar që të marrë drejtimin e FIFA-s rreth 10 vite më parë, kur konsiderohej favorit për postin më të lartë të futbollit botëror.

Paralelisht, ekipi ligjor i Platinisë pritet të nisë edhe një padi civile për dëmshpërblim ndaj FIFA-s, sipas një deklarate të përfaqësuesve të tij.

Këto zhvillime vijnë vetëm pak ditë para fillimit të Kupës së Botës në Amerikën e Veriut, një ngjarje ku Infantino pritet të ketë rol të rëndësishëm në skenën ndërkombëtare.

Infantino u zgjodh president i FIFA-s në vitin 2016, pas një periudhe të trazuar në organizatën botërore të futbollit, ndërsa Platini më herët kishte qenë një nga favoritët kryesorë për të marrë drejtimin e institucionit.