Ushtria izraelite ka kryer sulme të reja në qytetin Tiro të Libanit dhe ka lëshuar një urdhër të rrallë evakuimi për banorët e zonës dhe rrethinave.

Zëdhënësi i Forcave të Mbrojtjes së Izraelit (IDF), Avichay Adraee, ka paralajmëruar banorët përmes një njoftimi në platformën “X”, duke theksuar se veprimet ushtarake vijnë pas, siç u tha, shkeljeve të armëpushimit nga Hezbollahu dhe sulmeve ndaj territorit izraelit.

“Në dritën e shkeljes së marrëveshjes së armëpushimit nga Hezbollahu… IDF janë të detyruara të veprojnë me forcë,” thuhet në deklaratë.

Sipas mediave lokale, përfshirë Agjencinë Kombëtare të Lajmeve të Libanit (NNA), sulmet kanë goditur zona banimi në Tiro, ku ekipet e shpëtimit kanë gjetur edhe viktima të tjera. Një ditë më parë, autoritetet raportuan pesë të vrarë dhe tetë të plagosur në të njëjtën zonë.

Sulmet e fundit ndodhin pavarësisht një armëpushimi të ndërmjetësuar nga SHBA mes Izraelit dhe Libanit, ndërsa Hezbollahu ka deklaruar se nuk e njeh marrëveshjen për sa kohë forcat izraelite mbeten në territorin libanez.