Barcelona në bisedime me përfaqësuesit e Alabas

20:49 | 29 Tetor 2020

David Alaba është futur në vitin e fundit të kontratës me gjigantin gjerman Bayern Munich.

Mbrojtësi austriak është pjesë e bavarezëve që 12 vite, kur fillimisht luajti për grupmoshat e reja.

Ndërkohë në ekipin e parë ai është njëri nga lojtarët më të rëndësishëm e sot njëri nga mbrojtësit më të vlerësuar në botë.

Gjithsesi kampioni në fuqi i Evropës po tenton ta bind të nënshkruajë kontratë të re, por një gjë e tillë duket e pamundur.

Alaba ka vendosur të largohet nga Bayerni, teksa shumë skuadra janë vënë pas tij.

Mediat spanjolle kanë raportuar se për momentin Barcelona është skuadra favorite për t’i siguruar shërbimet e tij.

Katalunasit janë futur në bisedime me agjentët e lojtarit dhe janë të gatshëm të paguajnë një shumë deri në 10 milionë euro për ta transferuar në janar.

Nëse Bayerni nuk do ta pranojë një ofertë të tillë, atëherë Alaba mund të nënshkruajë një parakontratë me Barcelonën për t’iu bashkuar si transferim i lirë verën e vitit 2021.

28-vjeçari po kërkohet edhe nga skuadra tjera të mëdha si Juventus, Inter, Liverpool, Manchester United, Manchester City e Arsenal. /Telegrafi/

 

Shpërndaje në rrjete sociale

Lajmet më të lexuara