Shqipëria bllokon 27 ton miell gruri nga Greqia, nuk garantohej cilësia e produktit

19:01 | 9 Gusht 2018

Autoriteti Kombëtar i Ushqimit në Shqipëri ka bllokuar një ngarkesë prej 27 ton miell gruri më origjinë greke për shkak se nuk kishte fletë analizë që konfirmon sigurinë e produktit.

Gjatë kontrollit të ushtruar në Pikën Doganore Kakavijë, AKU konstatoi se një subjekt i cili pretendonte të fuste në Shqipëri produktin “miell gruri” kishte parregullsi në vërtetësinë e dokumentacionit që shoqëronte ngarkesën.

Fleta e analizës e paraqitur nga biznesi nuk korrespondonte me të dhënat e shtypura në thasët e miellit të grurit.

Pra, nuk vërtetohej se kjo fletë analize i përkiste këtij produkti si dhe nuk garanton sigurinë dhe cilësinë e miellit që do të hynte në tregun shqiptar.

Për më tepër subjekti nuk dispononte në gjuhën shqipe certifikatat e sigurisë ushqimore bazuar legjislacionit në fuqi.

Menjëherë nga Autoriteti Kombëtar i Ushqimit u bë bllokimi i ngarkesës me sasi 27 ton duke u bazuar legjislacionit në fuqi, gjithashtu do të ndjek procedurat doganore për kthimin në origjinë./Telegrafi

Shpërndaje në rrjete sociale