Reka: Votat tona nuk janë për tregti, ftoj qytetarët të votojnë më 5 maj

15:51 | 2 Maj 2019

Kandidati për kryetar shteti në Maqedoninë e Veriut Blerim Reka, përmes një postimi në Facebook ka folur rreth raundit të dytë të zgjedhjeve presidenciale, duke i ftuar qytetarët që më 5 maj të dalin sa më masivisht dhe siç thotë ai, të shpëtohet procesi euroatlantik.

Reka thotë se votat që ai i mori në raundin e parë nuk janë për tregti, ndërsa mohon edhe takimet me kundërkandidatët dhe liderët e partive të cilat i përkrahin ato.

“Në prag të rrethit të dytë të zgjedhjeve, më lejoni që të ju falemnderoj edhe një herë për votat tuaja në rrethin e parë. Rreth 80,000 vota, për vetëm tri javë në politikë; nuk mund të injorohen, sidomos, që ato u dhanë në zgjedhjet presidenciale me daljen më të ulët (42% në total, nga 20% në komunat shqiptare) dhe me pavlefshmërinë më të lartë të flet-votimeve, (rreth 33.000 sish!). Këto vota tuaja, mbështetën konceptin tim “Një Republikë për të gjithë- me ligjin mbi të gjithë”: si udha e vetme për NATO dhe BE. Edhe sot po e përsëris ate që e thash në fillim të fushatës sime, se nuk do lejoj tregëtinë me vota. As unë, e askush tjetër nuk jemi shit-blerës të votave tuaja, prandaj as nuk kemi të drejtë të ndikojmë në atë se për kë duhet të votoni këtë të diele”.

“Tregëtia me votat tuaja është kundër konceptit tim për Republikën, kundër sundimit të ligjit si shtyllë e saj dhe kundër demokracisë dhe lirisë së qytetarëve. Pse atëherë u dashka të mbahen zgjedhjet, nëse liderët në rrethin e dytë sillen si pronar të votave tuaja? Prandaj, duke i qëndruar besnik këtij parimi, ju siguroj që nuk ka pas as takime, as komunikim, as me kundër-kandidatët e as me liderët partiak të tyre, lidhur me thirrjen e mundshme të qytetarëve për të votuar këtë ose atë kandidat presidencial. Unë mund vetëm të ju apeloj, që me 5 maj, të dilni sa më masivisht në vend-votime dhe ta shpëtoni procesin Euro- Atlantik”, (sic) ka shkruar Reka, njofton Telegrafi Maqedoni.

Ndryshe, gjatë ditës së sotme u raportua se Reka do të realizojë takim me kryetarët e partive të cilat i dhanë mbështetje në kandidaturën e tij, Ziadin Sela dhe Bilall Kasami, ndërsa pas takimit pritet të dalin edhe me qëndrim zyrtar sa i përket rrethit të dytë të zgjedhjeve presidenciale.

Shpërndaje në rrjete sociale

Lajmet më të lexuara