Greqia këmbëngul në ndryshimin e Kushtetutës së Maqedonisë

19:39 | 26 Mars 2018

Qeveria Greke thotë se çështja e emrit do të zgjidhet së shpejti, por vetëm nëse Maqedonia pranon ndryshimet Kushtetuese.

Është ky dallimi me Qeverinë vendase e cila insiston në mos ndryshimin e e aktit më të lartë të shtetit. Zëdhënësi i Qeverisë Greke Dimistris Canakopulos tha se cilado marrëveshje që do arrihet mes fqinjëve, duhet të jetë në korniza të asaj që është shkruar në propozim-marrëveshjen e përpiluar nga Athina.

”Vullneti politik është deklarativ nga të dyja anët. Sidoqoftë, ende ekzistojnë çështje teknike, çështje juridike dhe çështje të qëndrimeve diamteralisht të kundërta për këtë kontest. E dini se Qeveria e IRJM-së ka ngritur disa dilema në lidhje me revizionin kushtetues, ne nga ana jonë insistojmë në revizion të Kushtetutës në lidhje me emrin e fqinjit, sepse kjo gjë është e nevojshme që të vlejë kushti “erga omnes”. Në këtë kornizë vazhdojnë bisedimet dhe mendoj se së shpejti do të arrijmë deri te një zgjidhje të pranueshme reciproke” – tha Dimistris Canakopulos, Zëdhënës i Qeverisë Greke.

Zëvendësministri i Punëve të Jashtme në Greqi, Janis Amanatidis tha se për disa pika është arritur marrëveshje ndërsa për disa të tjera ende po bisedohet dhe negociohet. Sipas tij, po bëhet një vlerësim i bisedimeve të deritanishme i cili do ti raportohet ndërmjetësit Nimic, më 30 mars në Vinenë ku pritet që të jetë takimi i radhës. “Grekët e pavarur”, pjesë e koalicionit qeverisës në Greqi, nuk ndryshojnë nga qëndrimi i tyre kundër përdorimit të termit Maqedonia. Madelena Papadopulu, zëdhënësja e Grekëve të Pavarur, tha se ndryshimet kushtetuese dhe irredentizmi janë pikat kyçe të bisedimeve.

”Ne si Grek të Pavarur nuk pajtohemi me cilëndo qoftë emër që do të përmbajë termin “Maqedonia” ose emra të shenjtëruar. Ky është qëndrimi i Grekëve të Pavarur i thënë që nga dita e parë. Kjo pozitë është e qartë dhe nuk ndryshohet” – deklaroi Madelena Papadopulo, Zëdhënëse e Grekëve të Pavarur.

Gazeta Katimerini nga burime të saja brenda Ministrisë së Punëve të Jashtme Greke, ka mësuar se rruga deri në gjetjen e një zgjidhjeje do të zgjasë. Kjo media shkruan se në fillim ekzistonte optimizëm se në periudhën, deri para Pashkëve, mund të arrihet një marrëveshje konkrete, e cila do të ratifikohej në prill ose në maj, por në praktikë dallimet dolën shumë më serioze nga ajo që u vlerësua në fillim. Vonesa vjen jo aq shumë për shkak të distancës diplomatike, sa për shkak të pengesave serioze politike me të cilat u ballafaquan të dy qeveritë në muajt paraprak, përfundon e përditshmja Katimerini. /Alsat-M

Shpërndaje në rrjete sociale

Lajmet më të lexuara